WAZIRI WA MAENDELEO YA MIJI NA VIJIJI WA NAMIBIA AFIKA NCHINI KUJIFUNZA UTAWALA WA ARDHI

Posted On: 23^rd August, 2016

Waziri wa Maendeleo ya Miji na Vijiji wa Namibia; Sophia Shaningwa amefika nchini na ujumbe wa Wataalamu wake kwa ajili ya kujifunza taratibu za Utawala wa Ardhi wa Tanzania.

Akizungumza na Naibu Waziri wa Ardhi, Nyumba na Maendeleo ya Makazi, Angeline Mabula (Mb), ofisini kwake; Waziri huyo ameeleza kuwa Bunge nchini Namibia limewaelekeza kufika Tanzania kujifunza taratibu zinazofanywa katika eneo la Utawala wa Ardhi, baada ya Bunge hilo kuona mfano mzuri wa nchi ya Tanzania kati ya nchi nyingine za Afrika walizofanyia tathimini katika eneo hilo.

Aidha, Waziri huyo ameeleza kuwa amenufaika sana kwa kujifunza mengi mazuri, na amependa zaidi utaratibu mzuri uliopo katika eneo la uwekezaji wa ardhi, na kusema kuwa atafanyia kazi yale aliyojifunza.

Kwa upande wake Mhe. Mabula amesema amefarijika kuona kuwa jopo hilo limeona mazuri yaliyomo ndani ya Utawala wa Ardhi nchini Tanzania. Aliendelea kusema; “ Sekta ya Ardhi bado ina changamoto nyingi, hasa ile ya Migogoro iliyopo kati ya Wakulima na Wafugaji, hatahivyo Wizara inajitahidi kuendelea kukabiliana na changamoto hiyo”.