MGOGORO WA ARDHI WA KIJIJI CHA MABWEGERE NA VIJIJI JIRANI WILANI KILOSA, MKOANI MOROGORO KUCHUNGUZWA KISHERIA.

Posted On: 19^th July, 2016

Waziri wa Ardhi, Nyumba na Maendeleo ya Makazi Mhe. William Lukuvi, amemteua, Jaji wa Mahakama Kuu ya Tanzania Kitengo cha Biashara Bwn. Jacob Mwambegele kuwa mchunguzi wa mgogoro sugu wa Ardhi katika Vijiji vya Mabwegele, Kambaya na vijiji jirani vya Mfulu, Mbigiri, Dumila, Mambwega na Matongolo vyote vya Wilayani Kilosa mkoani Morogoro

Akizungumza wakati akimkabidhi Jaji Mwambegele taarifa ya kamati ya Usuluhishi ofisini kwake jijini Dar es Salaam, Mhe. Lukuvi alisema uamuzi huo ni wa kisheria na ameuchukua baada ya hatua ya awali ya usuluhishi kutofikia malengo

Kabla ya uteuzi wa Jaji Jacob, msuluhishi wa mgogoro huo aliyeteuliwa alikuwa Bwn. Stephen Mashishanga ambae aliifanya kazi hiyo na kushindwa kuikamilisha baada ya upande mmoja kususia kikao cha usuluhishi. Baada ya hatua hiyo kushindikana, Mhe. Lukuvi ameamua kuteua mchunguzi kwa mujibu wa Sheria ya Ardhi kifungu namba 18 sura ya 113 na kifungu cha 7 (2) (a) sura ya 114 cha Sheria ya Ardhi ya Vijiji.

Waziri Lukuvi alisema, uteuzi wa Jaji Mwambegele ni sambamba na kamati ya watu 8 ambao watafanya kazi hiyo ya uchunguzi kwa muda wa siku 60 ili kubaini chanzo cha mgogoro huo uliodumu kwa zaidi ya miaka 27 na kusababisha madhara mbalimbali kwa wananchi wa Mkoa wa Morogoro.

Katika uchunguzi huo, mambo yatakayoangaliwa zaidi ni pamoja na; uhalali wa kisheria wa uanzishwaji wa kijiji cha Mabwegele, jinsi ardhi ya kijiji hicho ilivyopimwa kabla ya kuanzishwa kwa kijiji , kuchuguza iwapo ardhi ya kijiji hicho inatosheleza mahitaji ya wanakijiji wote wakiwepo wakulima na wafugaji, kufahamu kwa nini baadhi ya viongozi wa kijiji walisusia kamati ya usuluhishi ya awali.